virðing ᐧ fjölbreytni ᐧ sköpunarkraftur

#treyjudagur til stuðnings börnum með krabbamein 💙

Ísak formaður NFB tók sig til helgina fyrir skólasetningu og smíðaði húsgögn á útisvæðið við matsal nemenda! Aldeilis frábært framtak og nemendur njóta heldur betur góðs af í ágústblíðunni. ☀️ Þess má geta að FB er aðili að stóru Horizon Evrópuverkefni, GreenInCites, og hluti af því verkefni er að efla umhverfisvitund nemenda og útisvæði skólans. ☘️

Inga Sæland, mennta- og barnamálaráðherra, skipaði í dag Margréti Jónsdóttur Njarðvík í embætti skólameistara Fjölbrautaskólans í Breiðholti til næstu fimm ára. Margrét er með MBA-gráðu í stjórnun og doktorsgráðu í spænsku máli og bókmenntum auk kennsluréttinda. Hún starfaði sem rektor í Háskólanum á Bifröst og hefur gegnt ýmsum störfum hjá Háskólanum í Reykjavík og Háskóla Íslands. Skipunin tekur gildi 1. ágúst næstkomandi. Margréti eru færðar bestu óskir um farsæld og gott gengi í starfi skólameistara. 📸 Stjórnarráð Íslands Sjá nánar í frétt á vef Stjórnarráðs Íslands: https://www.stjornarradid.is/efst-a-baugi/frettir/stok-frett/2026/06/26/Margret-Jonsdottir-Njardvik-skipud-skolameistari-Fjolbrautaskolans-i-Breidholti/

Nú þegar innritun í framhaldsskóla er lokið gleður okkur að segja frá því að 251 nemandi sem var að ljúka grunnskóla hefur fengið skólavist í FB, auk þessu eru eldri nemendur sem hafa fengið skólavist í FB í haust 151 talsins. Útlit er fyrir að um 1.300 nemendur muni stunda nám í FB í dagskóla á komandi haustönn. Nýnemar og forráðamenn hafa fengið rafrænt bréf með upplýsingum um skólabyrjun en jafnframt er helstu upplýsingar að finna á heimasíðu skólans.

Guðrún Hrefna Guðmundsdóttir skólameistari útskrifaði sinn síðasta nemendahóp á útskriftarhátíð FB í liðinni viku en hún lætur af störfum að þessu skólaári loknu. Víðir Stefánsson aðstoðarskólameistari hélt af þessu tilefni kveðjuræðu þar sem hann fór í stuttu máli yfir þennan tíma: Guðrún Hrefna tók við embætti skólameistara FB 1. ágúst 2009 og hefur gegnt því síðan, í um 17 ár. Á þessum tíma hefur skólinn tekið gagngerum breytingum á starfsemi sinni. Eitt af fyrstu verkum Guðrúnar var að hefja markvissa stefnumótunarvinnu með þátttöku alls starfsfólks. Sú vinna lagði grunn að þróun skólans á árunum á eftir. Þegar Guðrún tók við embætti stóð skólinn frammi fyrir fjárhagsörðugleikum, sem jukust enn í kjölfar efnahagshrunsins. Afleiðingarnar voru meðal annars skerðing á námsframboði og kennslu, og hætt var við inntöku nýnema á verknámsbrautir um tíma. Á sama tíma dró úr aðsókn, ekki síst vegna stöðunnar í byggingaiðnaði. Þrátt fyrir þessar áskoranir var allt kapp lagt á að halda úti kennslu, og litlu mátti muna að húsasmiðabraut yrði lögð niður. Guðrún vann ötullega að því að bæta fjármögnun verknáms, sem skilaði sér síðar í breytingum á reiknireglu framlaga og bættri fjárhagsstöðu skólans. Á starfstíma hennar hefur margt áunnist. Þar má nefna uppbyggingu stafrænnar smiðju (Fab Lab) og nýja byggingu fyrir verk- og listnám, sem hún átti stóran þátt í að gera að veruleika. Hún hefur einnig lagt mikla áherslu á vellíðan nemenda, sem meðal annars endurspeglast í því að FB hlaut Gulleplið árið 2019 fyrir framúrskarandi heilsueflingarstarf. Þá var upphaf skóladags fært til kl. 8:30 til að styðja betur við svefn og líðan nemenda. Það er vart hægt að gera tæmandi grein fyrir öllum þeim umbótum sem Guðrún hefur leitt á þessum árum. Fyrir hönd starfsfólks skólans vil ég þakka þér, Guðrún, fyrir afar gott samstarf og þitt ómetanlega framlag til skólans.

Fleiri myndir frá útskriftinni: 1. Húsasmiðabraut 2. Starfsbraut 3. Snyrtibraut 4. Sjúkraliðabraut 5. Rafvirkjabraut 📸 Víkingur Magnússon

Falleg saga frá útskriftinni 🌟 Rotaryklúbburinn Reykjavík Breiðholt hefur stutt ötullega við FB í gegnum tíðina og við útskriftina sl. miðvikudag veitti klúbburinn í 69. sinn nemanda sem lýkur stúdentsprófi frá Fjölbrautaskólanum í Breiðholti námsverðlaun og viðurkenningarskjal. Til verðlaunanna var stofnað í minningu Jóns Stefáns Rafnssonar, tannlæknis, eins af stofnfélögum klúbbsins, sem féll frá langt um aldur fram. Að þessu sinni hlaut Erlendur Stefán Gíslason verðlaunin. Erlendur hefur allt frá fyrsta degi sýnt einstaka félagshæfni og ábyrgð gagnvart samnemendum og skólanum í heild. Hann hefur setið í skólaráði sem fulltrúi tölvubrautar og tekið þátt í þróunarstarfi í tengslum við sjálfbært hús skólans, þar sem hann ásamt samnemendum forritaði veðurmælaborð sem er á heimasíðu skólans. Erlendur er mikill námsmaður og lauk stúdentsprófi með einkunninni 9,78. En þar með er ekki öll sagan sögð, því sú fallega og skemmtilega tilviljun kom í ljós að Erlendur Stefán er barnabarn Jóns Stefáns sem verðlaunin eru stofnuð til minningar um og Erlendur var með húfu afa síns við útskrifina. Þetta hafði starfsfólks skólans enga vitneskju um fyrr en eftir útskriftarathöfnina þegar Erlendur og fjölskylda hans deildu þessu með skólastjórnendum. Það má því með sanni segja að verðlaunin hafi að þessu sinni ratað heim.

Útskriftarhátíð FB 27. maí 2026 💫 Í dag útskrifuðust 168 nemendur frá FB við hátíðlega athöfn í Silfurbergi Hörpu, þar af útskrifuðust 14 með tvö skírteini. 36 nemendur luku prófi af húsasmiðabraut, 35 af rafvirkjabraut, 12 af starfsbraut, 17 sjúkraliðar útskrifuðust og 4 snyrtifræðingar. Nemendur sem luku stúdentsprófi voru 76. Að auki voru tveir skiptinemar í FB í vetur sem voru kvaddir við útskriftina. 💫 Guðrún Hrefna Guðmundsdóttir skólameistari stýrði athöfninni og Víðir Stefánsson aðstoðarskólameistari flutti yfirlitsávarp. Þau Karen Ósk Gísladóttir og Erlendur Stefán Gíslason fluttu ræður útskrifaðra, Emma Rose Noviczski nýstúdent söng við undirleik Pálma Sigurhjartarsonar auk þess sem hún lék sjálf á gítar, Elvar Bragi Kristjónsson lék á trompet við athöfnina. 💫 Þremur kennurum var þakkað fyrir vel unnin störf en þau láta nú af störfum sökum aldurs. Það eru þau Halldóra N. Björnsdóttir kennari á starfsbraut, Guðrún Hallgrímsdóttir fagstjóri starfsbrautar og Jakob Þór Pétursson íþróttakennari.  💫 Útskriftarhátíðinni lauk á því að Guðrún Hrefna Guðmundsdóttir skólameistari var kvödd en hún lætur af störfum eftir þetta skólaár eftir að hafa verið skólameistari FB síðastliðin 17 ár eða frá árinu 2009. Víðir aðstoðarskólameistari flutti kveðjuræðu þar sem farið var yfir hennar góða starf í þágu skólans.  💫 Fjölmargir nemendur hlutu verðlaun og viðurkenningar fyrir góðan námsárangur en Benedikt Fazakerley Richardsson á tölvubraut var dúx skólans með einkunnina 9,83 sem er hæsta einkunn sem hefur verið gefin á stúdentsprófi í FB og Erlendur Stefán Gíslason var semídúx með einkunnina 9,78. 💫 Innilega til hamingju með áfangann öll sem eitt! 💫 Fleiri fréttir og myndir birtast á næstu dögum hér og á heimasíðu skólans.

Síðastliðinn föstudag dimmiteruðu útskriftarefni annarinnar í blíðskaparveðri. Dagurinn byrjaði venju samkvæmt á morgunmat í boði skólans, því næst fóru nemendur um skólann og kvöddu kennara og starfsfólk áður en þau fóru með rútum niður í bæ. Þar var farið í ratleik og skemmtunin hélt svo áfram fram á kvöld. Í dag er síðasti kennsludagur í FB en útskriftin fer fram í Hörpu þann 27. maí.

Við fengum góða gesti í gær þegar Inga Sæland mennta- og barnamálaráðherra kom í heimsókn, með henni í för voru Ágúst Ólafur Ágústsson aðstoðarmaður ráðherra og Ragnhildur Bolladóttir skrifstofustjóri framhaldsskóla og framhaldsfræðslu. Guðrún Hrefna skólameistari, Víðir aðstoðarskólameistari og Berglind Halla áfangastjóri gengu með ráðherra um skólann sem kynnti sér skólastarfið og spjallaði við starfsfólk og nemendur. Gestirnir skoðuðu einnig nýja verknámsaðstöðu skólans sem er vel á veg komin en með nýbyggingunum mun verknámsaðstaða við FB meira en tvöfaldast og áætlað er að kennsla hefjist þar í janúar 2027. Meðfylgjandi eru myndir frá heimsókninni.

Nýverið fóru 12 nemendur af ýmsum verknámsbrautum FB í ævintýralega ferð til borgarinnar Saint-Anne á Gvadelúp-eyjaklasanum í Karabíska hafinu en eyjarnar tilheyra Frakklandi. Heimsóknin var hluti af verkefninu Island to Island: Sustainable Vocational Practice in Iceland and Guadeloupe, sem snýr að sjálfbærni og hnattrænni hlýnun og er styrkt af Erasmus+. Unnið var með nemendahópi úr skólanum Lycée des Métiers General et Technologique Yves Leborgne en nemendur frá þeim skóla heimsóttu FB í mars sl. Unnið var að fjölbreyttum verkefnum í tengslum við raforku, heilbrigði, íþróttir og textíl ásamt sögu og menningu eyjanna með áherslu á hvernig þessar tvær ólíku eyjar glíma við hlýnun jarðar. Meðfylgjandi eru svipmyndir annars vegar frá ferðinni til Gvadelúp og hins vegar frá Íslandsheimsókninni.

Skákmót FB fór fram í dag en öflugur hópur nemenda hefur teflt reglulega í vetur. Páll Ísak stóð uppi sem skákmeistari FB, Oleksiy var í 2. sæti og Ismael í því þriðja. Til hamingju strákar! 🏆

Vor í lofti ☀️

Nemendur af ýmsum brautum, sem eru í áfanganum Saga Póllands, fóru í síðustu viku í ferð til Kraká í Póllandi ásamt þremur kennurum. Meðal annars fóru þau í skólaheimsókn þar sem unnið var með pólskum nemendum sem kynntu svo borgina fyrir þeim, í Wieliczka-saltnámurnar og í dagsferð í útrýmingarbúðirnar í Auschwitz-Birkenau.

Gaman er að fylgjast með byggingu nýrrar verknámsaðstöðu við FB, húsin eru heldur betur farin að taka á sig mynd að utan sem innan en í húsunum verður aðstaða fyrir rafvirkjabraut, húsasmiðabraut og myndlistarbraut. Í öðru af nýju húsunum verða ellefu 70 fermetra kennslustofur fyrir bóklegar og verklegar greinar auk mötuneytis nemenda. Í hinu húsinu verður listasmiðja fyrir myndlistarbraut ásamt gluggasmiðju og verkstæðisaðstöðu fyrir húsasmíðanema en hluti af þeirra námi hefur hingað til farið fram utandyra, auk þess verður salur fyrir verklega rafvirkjun, fyrirlestrarsalur og salernis- og sturtuaðstaða. Áætlað er að húsin verði afhent í nóvember 2026 og kennsla hefjist í janúar 2027 en í sumar klárast lóðafrágangur, hjólaskýli o.fl. utandyra. Endurbótum á gömlu smiðjunni er lokið að utanverðu og verður hún tekin í gegn innandyra að ári. Meðfylgjandi myndir voru teknar í vikunni þegar fagstjórar húsasmiða-, myndlistar- og rafvirkjabrautar sýndu starfsfólki nemendaþjónustu FB nýju smiðjurnar.

Nemendur fata- og textílbrautar FB fóru í námsferð til Portó á dögunum. Þar heimsóttu þau fatahönnunarskólann Escola de moda, fengu frábæra leiðsögn um skólann og tóku þátt í skóladegi með nemendum. Einnig var farið á listasafn og unnin hönnunar- og skissuvinna fyrir komandi lokasýningu frá brautinni. Hópurinn fór í risastórt efnavöruhús þar sem efni voru keypt fyrir hönnunarverkefni. Frábær ferð og nemendur komu heim með fullt af hugmyndum í farteskinu.

🇮🇸🇩🇰 Hópur 15 nemenda af opinni braut, náttúrufræði-, félagsfræði-, íþrótta-, og sjúkraliðabraut ásamt kennurunum Guðnýju og Ívari tók þátt í Nordplus-verkefni fyrir hönd skólans sem endaði með ferð til Óðinsvéa í Danmörku í síðustu viku. Verkefnið ber heitið The future of farming, health and living conditions of people in Iceland and Denmark en dönsku nemendurnir heimsóttu okkur hingað í FB í september sl. Hópurinn heimsótti Nordfyns Gymnasium og vann þar skemmtileg verkefni, m.a. að draga DNA úr jarðarberjum, sækja litarefni úr Dactylopius coccus sem notað er í gosdrykki ásamt því að spá fyrir um lífsstíl og framtíðarhúsnæði með tilliti til loftslagsbreytinga. Hópurinn fór síðan saman í Kaupmannahafnarháskóla og hlustaði á fyrirlestur um breytingu plantna með líftæknilegum aðferðum, sömuleiðis tengt hlýnun jarðar. Inn á milli var síðan slegið á létta strengi og farið í áhugaverðar skoðunarferðir. 🇮🇸🇩🇰

Starfsbraut FB fór í afar vel heppnaða náms- og útskriftarferð til Tenerife í síðustu viku. ✈️ Hópurinn naut samverunnar í botn og upplifði margt skemmtilegt, þar á meðal áhugaverða kynningu á þjóðarglímu heimamanna. Þá heimsóttu þau framhaldsskóla á eyjunni þar sem þeim var einstaklega vel tekið. Auðvitað voru svo vel valdir túristastaðir heimsóttir. 🌴 Ferðin heppnaðist í alla staði frábærlega og voru allir sáttir við góða ferð og komu heim reynslunni ríkari. ☀️ Ferðin var styrkt af Erasmus+.

Sjö nemendur á snyrtibraut tóku þátt í Erasmusverkefni í Aþenu í síðustu viku. Verkefnið var samstarfsverkefni fjögurra landa; Ítalíu, Hollands og Grikklands auk Íslands. Á myndunum má sjá hluta nemenda FB á lokadegi þar sem meðal annars var keppt um færni í húðmeðferð, íslenska hópinn í skoðunarferð á Akropolishæð og lokum hópinn sem var í fyrsta sæti keppninnar en Ásta María Vestmann var í þeim hópi auk fulltrúa frá hinum löndunum.

14 nemendur af íþróttabraut FB eru í námsferð á Tenerife þessa dagana ásamt Ágústi og Svövu Ýri íþróttakennurum. Hópurinn hefur fengið að reyna sig í hinum ýmsu íþróttum og fór t.d. á æfingu í kanarískri glímu og fylgdist með atvinnumannaliði í íþróttinni. Einnig var farið í skólaheimsókn þar sem nemendur fengu að spreyta sig á ýmsum gömlum þjóðaríþróttum, t.d. steinakasti og baddý með greinum af pálmatrjám. Þau fengu svo brimbrettakennslu hjá færustu brimbrettaþjálfurum eyjunnar. Ferðin er styrkt af Erasmus+.

Sigríður Anna fagstjóri bóknáms smellti af þessari stjórnendasjálfu þegar stjórnendur fóru í skoðunarferð um ný verknámshús FB en framkvæmdir ganga vel og er stefnt að því að hefja kennslu á vorönn 2027.

10. bekkingar í Breiðholti heimsækja FB þessa dagana og fá kynningu á skólanum og náminu en 13. mars opnar almenn innritun í framhaldsskóla. 💜

Söngvakeppni FB fór fram í gær, fimmtudaginn 29. janúar, og það var Rán sem bar sigur úr býtum með laginu It’s Oh So Quiet. Dómnefndin var skipuð af Andreu Jónsdóttur útvarpskonu, Iveta Licha enskukennara í FB og Jóhanni Gunnari Kristjánssyni formanni Sultunnar, tónlistarnefndar FB. Við óskum Rán innilega til hamingju með sigurinn og hlökkum til að fylgjast með Söngvakeppni framhaldsskólanna sem fer fram 11. apríl í Háskólabíó.

Stjórn nemendafélags FB er þessa vikuna á Tenerife ásamt alþjóðafulltrúa og félagsmálafulltrúa skólans á vegum Erasmus+. Þau sækja námskeið í leiðtogafærni og valdeflingu þar sem þau hitta m.a. unga áhrifavalda, frumkvöðla og ýmsa fyrirlesara auk þess sem þau kynnast spænskum verknámsskólum, spænskri menningu og náttúru. 🇮🇸🇪🇸

💫 Í dag útskrifuðust 143 nemendur frá FB við hátíðlega athöfn í Eldborg Hörpu, þar af útskrifuðust 18 með tvö skírteini. 43 nemendur luku prófi af húsasmiðabraut, 21 af rafvirkjabraut, 36 sjúkraliðar útskrifuðust og 8 snyrtifræðingar. Nemendur sem luku stúdentsprófi voru 53. 💫 Guðrún Hrefna Guðmundsdóttir skólameistari stýrði athöfninni og Víðir Stefánsson aðstoðarskólameistari flutti yfirlitsávarp. Þau Lovísa Margrét Eðvarðsdóttir og Tristan Þór Traustason fluttu ræður útskrifaðra, Lovísa Margrét söng jafnframt við undirleik Pálma Sigurhjartarsonar en auk hans lék Elvar Bragi Kristjónsson á trompet við athöfnina. 💫 Hauki Pétri Benediktssyni stærðfræðikennara var þakkað fyrir vel unnin störf en hann lætur nú af störfum sökum aldurs. Fríða Rós Ásgeirsdóttir var dúx skólans með einkunnina 8,99 og hún hlaut einnig viðurkenningu frá Soroptomistaklúbbi Hóla og Fella sem og viðurkenningu fyrir góðan árangur í námi á sjúkraliðabraut. Lovísa Margrét Eðvarðsdóttir hlaut viðurkenningu frá Rótaryklúbbi Breiðholts auk viðurkenningar frá skólanum fyrir framlag til skólasamfélagsins. Fleiri nemendur hlutu verðlaun og viðurkenningar fyrir góðan námsárangur sem má lesa um á heimasíðu skólans. 💫 Innilega til hamingju með áfangann öll sem eitt! 💫 Fleiri myndir birtast á næstu dögum á heimasíðu skólans.

Sl. föstudag dimmiteruðu útskriftarefni FB. Dagskráin hófst með morgunmat í boði skólans og svo tók við skemmtidagskrá fram á kvöld. Við hlökkum til að fagna með ykkur í Hörpu 22. desember! 🎉

Saga FB kom út í október sl. í tilefni af 50 ára afmæli skólans. Bókin fæst í Iðnú og verslunum Eymundsson. Aftan á bókinni segir: Fjölbrautaskólinn í Breiðholti (FB) var fyrsti fjölbrautaskóli landsins og markaði tómamót í íslenskri skóla- og menntasögu. Á ýmsu gekk fyrstu árin, þau einkenndust af miklum metnaði, fögrum fyrirheitum og stórum draumum en jafnframt margvíslegum erfiðleikum og átökum. Í bókinni er viðburðarík saga FB í hálfa öld rakin í lifandi frásögn og sjónum beint að námi og kennslu, stjórnendum, kennurum og öðru starfsfólki, en ekki síst litríkum og afar fjölbreyttum nemendahópi sem alla tíð hefur sett mark sitt á skólabraginn. Andri Þorvarðarson hefur starfað sem sögukennari við FB síðan 2015. Hann útskrifaðist með BA-próf í sagnfræði árið 2012 og MA-gráðu í sögukennslu árið 2014 frá Háskóla Íslands.

Samsýning framhaldsskólanna opnaði sl. föstudag í Sögu við Hagatorg, nýju húsnæði Menntavísindasviðs HÍ. Listnámsnemendur í FB taka þátt í sýningunni ásamt fleiri skólum. Sýningin er opin öllum til 4. desember kl. 10-16. Ekki missa af þessu! www.samsyning.is

Framkvæmdir vegna stækkunar verknámsaðstöðu við FB ganga vel. Í byggingu eru tvö ný smiðjuhús auk þess sem skipt var um þak, glugga og hurðir í gömlu smiðjunni. Búið er að loka öðru af nýju húsunum og er grindin af því seinna langt komin. Með nýbyggingunum mun verknámsaðstaða við FB meira en tvöfaldast en þar verður aðstaða fyrir húsasmíði, rafvirkjun og listgreinar og er áætlað að hefja þar kennslu í janúar 2027.

Jóhann Ísak nýstúdent af myndlistarbraut heimsóttur til Lissabon þar sem hann er í starfsþjálfun hjá Hangar gallerý. Erasmus+

Nemendur í JARÐ2 fóru í gær út á Reykjanes þar sem þau skoðuðu m.a. háhitasvæði, sjávarrof og afleiðingar jarðskjálfta og eldvirkni á náttúru og byggð. 🌋

Ath: Fleiri myndir frá afmælishátíðinni eru á myndasíðu skólans. https://www.flickr.com/photos/188719397@N05/albums/72177720329570083/ 🎊 Fjölbrautaskólinn í Breiðholti átti 50 ára afmæli laugardaginn 4. október og var því fagnað við hátíðlega athöfn í sal skólans. Guðrún Hrefna Guðmundsdóttir skólameistari setti hátíðina og bauð Guðmund Inga Kristjánsson mennta- og barnamálaráðherra velkominn sem og Heiðu Björgu Hilmisdóttur borgarstjóra. Jón L. Árnason bað svo um orðið fyrir hönd Rótarýklúbbsins Reykjavík-Breiðholt en hann sagði frá stuðningi klúbbsins við skólann í gegnum tíðina og greindi af þessu tilefni frá rausnarlegum styrk til starfsbrautar skólans. Ingvar Sverrisson formaður skólanefndar til fjölda ára sem er jafnframt fyrrverandi nemandi FB flutti því næst hátíðarræðu og að lokum sagði Gunnar Þór Bjarnason ritstjóri bókarinnar Fjölbraut í 50 ár frá útgáfuferlinu en bókin sem er eftir Andra Þorvarðarson sögukennara við skólann kom út þennan sama dag. Pálmi Sigurhjartarson og Unnur Birna Björnsdóttir fluttu tónlist og Lovísa Margrét Eðvarðsdóttir nemandi í FB söng við þeirra undirleik. 🎂 Að lokinni dagskrá var gestum boðið að ganga um skólann. Auk þess sem hægt var að skoða kennslustofur og aðra aðstöðu voru þrjár sýningar á göngum skólans, hver og ein tileinkuð þeim þremur skólameisturum sem hafa starfað við skólann og endurspegluðu sýningarnar ólíkan tíðaranda á fjölbreyttan hátt. Að lokum var gestum boðið upp á veitingar í galleríi skólans þar sem einnig var fróðleg sýning um listafólk sem hefur gengið í skólann auk þess sem hægt var að fræðast um ýmsa tölfræði tengda FB.  💐 Við þökkum þeim fjölmörgu gestum sem komu í afmælið, einnig þökkum við fyrir blóm, gjafir og heillaóskir sem skólanum hafa borist á síðustu dögum. 📸 Haraldur Guðjónsson Thors

FB er 50 ára í dag 4. október. 🎉 Af því tilefni er viðtal við Guðrúnu Hrefnu skólameistara í sunnudagsblaði Morgunblaðsins. Til hamingju með daginn allir FB-ingar og verið hjartanlega velkomin í afmælisveisluna í dag kl 14. 🎈Hér má lesa styttri útgáfu viðtalsins: https://www.mbl.is/frettir/innlent/2025/10/04/fb_er_skoli_med_stort_hjarta/

Nýnemahópur Ástu líffræðikennara tók til hendinni í vikunni og snyrti beðin í kringum skólann. Frábærir og framtakssamir nemendur! 🌳🌿💚

Þrír fyrrverandi nemendur úr FB hlutu nýverið styrk úr Afreks- og hvatningarsjóði stúdenta Háskóla Íslands. Þetta eru þau Theódór Helgi Kristinsson, Rawaa M S Albayyouk og Kristinn Rúnar Þórarinsson. Styrkirnir eru veittir nýnemum við Háskóla Íslands sem hafa náð framúrskarandi árangri í námi til stúdentsprófs og jafnframt látið til sín taka á öðrum sviðum, svo sem félagsstörfum í framhaldsskóla eða listum og/eða íþróttum. Theódór Helgi stundar nú nám í tölvunarfræði, Rawaa í tannsmíði og Kristinn Rúnar í jarðeðlisfræði. Við óskum þeim innilega til hamingju!

Nú þegar innritun í framhaldsskóla er lokið gleður okkur að segja frá því að 263 nemendur sem voru að ljúka grunnskóla hafa fengið skólavist í FB auk þess sem 140 eldri nemendur hefja nám í FB í haust. Útlit er fyrir að um 1300 nemendur muni stunda nám í FB í dagskóla á komandi haustönn. Nýnemar og forráðamenn hafa fengið rafrænt bréf með upplýsingum um skólabyrjun en jafnframt er helstu upplýsingar að finna á heimasíðu skólans: www.fb.is.

Gunnhildur og Brynhildur snyrtifræðingar mættar í starfsþjálfun í Carnac í Frakklandi, verða í fjórar vikur. @erasmusplus_iceland @erasmusplus.is

Selka og Elva snyrtifræðingar mættar í vinnuna í Guidel í Frakklandi, verða í fjórar vikur í starfsþjálfun. @erasmusplus_iceland @erasmusplus.is

Þessar tvær, Áslaug og Yurui, eru mættar til Frakklands í fjögurra vikna starfsþjálfun hjá Gwenn le Brenn @gwennlebrenn og BTP CFA í St. Brévin. @erasmusplus_iceland @erasmusplus.is

Helen Giang, sem útskrifaðist af textílbraut í vor og hlaut nokkur verðlaun fyrir námsárangur, mætti til Porto í lok maí til þess að vera í 4 vikur í starfsþjálfun hjá Michaela Larische. Það er hönnunanfyrirtæki sem sérhæfir sig í dansbúningum. @erasmusplus_iceland @erasmusplus.is

Í lok maí fór hópur nemenda af fata- og textílbraut í námsferð til Porto í Portúgal ásamt þremur kennurum sínum. Ferðin var viðburðarík og fræðandi þar sem nemendur fóru t.d. í WOW-safnið, heimsóttu skólann Escola de moda do Porto og skoðuðu efnabúðir. Einnig var farið í heimsókn í Serralves-safnið; nemendur fóru í hugmynda- og skissuvinnu í safngarðinum út frá textílsýningu Mounira Al Solh frá Beirút. Nemendahópurinn kemur reynslunni ríkari á lokaárið sitt í náminu næsta haust! Ferðin er styrkt af Erasmus+.

Í dag útskrifuðust 175 nemendur frá FB við hátíðlega athöfn í Silfurbergi Hörpu, þar af útskrifuðust 27 með tvö skírteini. 44 nemendur luku prófi af húsasmiðabraut, 34 af rafvirkjabraut, 9 af starfsbraut, 28 sjúkraliðar útskrifuðust og 10 snyrtifræðingar. Nemendur sem luku stúdentsprófi voru 77. 💫 Guðrún Hrefna Guðmundsdóttir skólameistari stýrði athöfninni og Víðir Stefánsson aðstoðarskólameistari flutti yfirlitsávarp. Þeir Jeremias Borjas Tablante og Sveinn Máni Sigurðsson fluttu ræður útskrifaðra, Kristinn Rúnar Þórarinsson nýstúdent lék á tenórsaxófón og Klara Blöndal nemandi við FB söng við undirleik Pálma Sigurhjartarsonar en auk hans lék Elvar Bragi Kristjónsson á trompet við athöfnina. 💫 Þeim Heimi Jóni Guðjónssyni, Helga S. Reimarssyni og Júlíusi Júlíussyni kennurum á rafvirkjabraut var þakkað fyrir vel unnin störf en þeir láta nú af störfum sökum aldurs. Fjölmargir nemendur hlutu verðlaun og viðurkenningar fyrir góðan námsárangur en Kristinn Rúnar Þórarinsson var dúx skólans með einkunnina 9,61. 💫 Innilega til hamingju með áfangann öll sem eitt! Feiri myndir birtast á næstu dögum á heimasíðu skólans.

Sjúkraliðanemar í starfsþjálfun í Hornslet í Danmörku í fjórar vikur #erasmus.is

Snyrtifræðinemar mættar í starfsþjálfun í fjórar vikur á Gran Canaria. #erasmus.is

Sjúkraliðanemar mættar til Danmerkur í starfsþjálfun í fjórar vikur í Ebeltoft. #erasmus.is

Smá skemmtun áður en alvaran tekur við hjá rafvirkjanemunum #erasmusinternship #erasmus.is

Rafvirkjanemar mættir til Danmerkur í fjögurra vikna starfsþjálfun. Erasmus+ # erasmus.is

Snyrtifræðinemar mættar til Tenerife. Verða í mánuð í starfsþjálfun. Erasmus+ #erasmus.is

Nemendur í íslenskuþorpinu elduðu saman shawarma að palestínskum hætti í kennslueldhúsinu. Svo voru ýmis mikilvæg mál rædd á íslensku yfir matnum. 💜

Fjölmennur og glæsilegur hópur útskriftarefna dimmiteraði sl. föstudag. Dagurinn hófst með morgunverði í boði skólans, svo fóru nemendur um skólann og kvöddu kennara og starfsfólk og fengu að því loknu grillaða hamborgara í Smiðjunni áður en þau fóru í ratleik í miðbænum. Gangi ykkur öllum vel á lokasprettinum! 💜

Hefð er fyrir því að útskriftarefni láti gott af sér leiða á góðgerðardegi þegar styttist í útskrift. Skemmtilegur og samheldinn hópur nemenda hittist í vikunni fyrir páskafrí og týndi rusl í kringum FB og gerði skólalóðina snyrtilega. Að loknu góðu dagsverki voru svo grillaðar pylsur. Nú er dimmitering framundan þann 2. maí og svo útskriftin sjálf 27. maí. Gangi ykkur vel á lokasprettinum! 💜

Það var fullt út úr dyrum á opnu húsi í FB í dag, við þökkum ykkur öllum fyrir komuna og hlökkum til að taka á móti nýjum nemendum í haust! 💜

Brot af skapandi og skemmtilegum lokaverkefnum sem nemendur í ÍSLE3NN unnu úr bókinni Hamingja þessa heims eftir Sigríði Hagalín. 👏🏼👏🏼👏🏼

Allir nemendur á snyrtibraut FB tóku þátt í sýningunni Mín framtíð 2025 á einn eða annan hátt. 12 nemendur kepptu á Íslandsmóti iðn- og verkgreina en keppt var í andlitsmeðferð, herða- og handanuddi, litun og plokkun, slökunarnuddi og þjölun og lökkun á höndum. Þær sem ekki kepptu ýmist kynntu fagið með því að bjóða upp á handanudd og ilmhjúp á bás Félags íslenskra snyrtifræðinga eða kynntu námið fyrir gestum og gangandi í kynningarbás FB. Nemendur voru til fyrirmyndar og þökkum við þeim fyrir sitt framlag á afar vel heppnuðum dögum. Úrslit keppninnar urðu svohljóðandi: • Sæbjörg Jóhannesdóttir – 1. sæti • Þórey Lára Halldórsdóttir – 2. sæti • Natalía Valgeirsdóttir – 3. sæti Allir keppendur stóðu sig einstaklega vel og við óskum þeim öllum innilega til hamingju með frábæra frammistöðu! 📸 Fyrstu myndina tók Sigtryggur Ari Jóhannesson.

Nemendur frá FB kepptu í fjórum keppnisgreinum á Íslandsmóti iðn- og verkgreina í liðinni viku. Tristan Þór Traustason keppti í húsasmíði og í rafvirkjun kepptu þau Karen Ósk Gísladóttir og Guðni Hlynur Granz. FB átti í fyrsta sinn í ár fulltrúa í keppni í vefþróun en lið FB skipuðu Adam Gapinski, Álfgrímur Davíð Pétursson og Halldór Hrafn Reynisson. Árangur FB-inganna var glæsilegur en lið FB lenti í 2. sæti í vefþróun, Tristan Þór lenti í 3. sæti í húsasmíði og Guðni Hlynur í 2. sæti í rafvirkjun. Við óskum öllum keppendum hjartanlega til hamingju með frábæra frammistöðu! Að auki tóku svo 12 nemendur þátt í keppni í snyrtifræði, nánari umfjöllun og myndir eru væntanleg. Aðrir nemendur á brautunum stóðu svo vaktina í kynningarbásnum okkar og svöruðu spurningum gesta um skólann og námið í FB og voru sérlega flottir fulltrúar skólans, við þökkum þeim öllum fyrir þeirra framlag!

Mín framtíð 2025, Íslandsmót iðn- og verkgreina ásamt framhaldsskólakynningum, fór fram í Laugardalshöll 13.-15. mars. FB var með glæsilegan kynningarbás í höllinni þar sem fulltrúar úr hópi starfsfólks og nemenda kynntu nám á ólíkum brautum skólans auk þess sem nemendur í húsasmíði, rafvirkjun, snyrtifræði og tölvubraut tóku þátt í Íslandsmótinu. Nemendur á sjúkraliðabraut mældu blóðþrýsting og mettun hjá gestum og gangandi, nemendur á listasviði teiknuðu andlitsmyndir og snyrtifræðinemendur buðu upp á dekurstund og nemendur á náttúruvísindabraut leyfðu gestum að skoða geitungabú í smásjá svo eitthvað sé nefnt. Allir þeir nemendur sem voru á staðnum fyrir hönd FB voru glæsilegir fulltrúar skólans! Fleiri myndir og umfjöllun um keppendur eru væntanleg. Þau sem vilja kynna sér skólann, námið og þjónustuna betur eru velkomin á opið hús í FB þann 25. mars n.k. klukkan 17:00-18:30. Hlökkum til að taka á móti ykkur!

Forsetinn kíkti við hjá okkur ❤️

Mín framtíð 2025. Rauðu peysurnar að störfum!

Mín framtíð 2025 FB keppir

Nemendur í vefforritun á tölvubraut tóku að sér á haustönn að setja upp veðurvefsíðu fyrir skólann; vedur.fb.is. ☀️🌦️💨 Fyrir vefsíðuna nýta þeir gögn frá veðurstöð FB, sem er partur af samstarfsverkefninu Vistvæna húsið, unnið með FB, Fab Lab Rvk., HR, Rafal og Umhverfisstofnun en Rafal lagði alfarið til allan búnað og fjarskipti fyrir veðurstöð FB. Á veðursíðunni er hægt að sjá í rauntíma hvernig veðrið er í FB og auk þess veðurspá sex daga fram í tímann sem fengin er í gegnum vedur.is. Þeir nemendur sem unnu veðurvefsíðuna eru Álfgrímur D. Pétursson, Benedikt F. Richardsson, Bjarki F. Finnsson, Erlendur S. Gíslason og Pétur Ó. Ágústsson. Kennari þeirra er Hjörvar Ingi Haraldsson. ☀️

Í gær fór hópur nemenda á íþróttabraut ásamt Sigurgeiri Andra íþróttakennara í heimsókn í Háskóla Íslands. Dr. Milos Petrovic og nemendur í íþrótta- og heilsufræði við HÍ tóku á móti þeim og sáu um tímann þar sem farið var í ýmsar mælingar og æfingar. Takk fyrir okkur!

Félag enskukennara á Íslandi (FEKÍ) stendur fyrir árlegri smásögukeppni á landsvísu. Í ár voru fjölmargir nemendur sem tóku þátt af öllu landinu og því er mjög ánægjulegt að segja frá því að Zuzanna Olszewska nemandi í FB hlaut 1. verðlaun fyrir söguna sína Town of Echos. Verðlaunaafhending fór fram í Veröld - Húsi Vigdísar þann 17. febrúar. Á fyrri myndinni er Zuzanna ásamt Bryony Mathew, sendiherra Bretlands á Íslandi og á þeirri seinni er Zuzanna með Daða enskukennara og móður sinni Katarzyna Olszewska sem vill svo skemmtilega til að er fyrrum nemandi í FB. Við óskum henni innilega til hamingju með þennan frábæra árangur og hvetjum ykkur til að halda áfram að skrifa ykkar sögur.

Bergmálið – undankeppni FB fyrir söngkeppni framhaldsskólanna var haldin í gær. Það var Klara Blöndal sem bar sigur úr býtum með flutningi sínum á laginu My all en í öðru sæti var Sylvía Lind og Rán Ósk í því þriðja. Dómarar í keppninni voru Logi Pedro, Svavar Lárus og Iveta Licha. Klara Blöndal verður því fulltrúi FB í söngkeppni framhaldsskólanna sem verður haldin þann 12. apríl þar sem hún mun flytja íslenska útgáfu af sigurlaginu. Innilega til hamingju!

Í kvöld keppir FB við FS í fyrstu umferð Gettu betur en keppnin verður í beinu streymi á www.ruv.is. Lið FB skipa þau Emelía Valey, Markús Ægir og Stefnir Daníel. Varamenn eru Elísabet Heiða og Friðgeir Örn. Gangi ykkur vel og áfram FB! 👏🏼👏🏼👏🏼

Í dag útskrifuðust 150 nemendur frá FB við hátíðlega athöfn í Eldborgarsal Hörpu, þar af 18 með tvö skírteini. 27 nemendur luku prófi af húsasmiðabraut, 27 af rafvirkjabraut, 24 sjúkraliðar útskrifuðust og 12 snyrtifræðingar. Nemendur sem luku stúdentsprófi voru 60. 💫 Þær Ásgerður Ágústsdóttir og Elísabet X. Sveinbjörnsdóttir fluttu ræður útskrifaðra, Daníel George Þórarinsson og Hannes Orri Arnarson nýstúdentar léku á hljóðfæri og Lovísa Margrét formaður NFB söng við undirleik Pálma Sigurhjartarsonar en auk hans lék Elvar Bragi Kristjónsson á trompet við athöfnina. 💫 Þeim Ágústu Unni Gunnarsdóttur fráfarandi kynningarstjóra og alþjóðafulltrúa og Elínu Þóru Rafnsdóttur var þakkað fyrir vel unnin störf en þær láta nú af störfum sökum aldurs. Fjölmargir nemendur hlutu verðlaun og viðurkenningar fyrir góðan námsárangur, Elísabet X. Sveinbjörnsdóttir var dúx skólans með einkunnina 9,50. 💫 Innilega til hamingju með áfangann öll sem eitt! Fleiri myndir birtast á næstu dögum á heimasíðu skólans.

Sigurvegari í jólakortasamkeppni 2024 er Jóhann Ísak Ingimundarson. Við óskum honum innilega til hamingju! Fjöldi frábærra tillaga voru sendar inn og hér eru nokkrar. @fbmyndlist

Nemendur sem útskrifast 19. desember n.k. dimmiteruðu s.l. föstudag. Skrautlegur hópurinn fékk morgunmat í boði skólans áður en skemmtidagskráin hófst. Gangi ykkur vel á lokasprettinum kæru útskriftarefni! 💜

Fyrr í nóvember var síðasta ferðin farin í sambandi við DaDom-verkefni sjúkraliðabrautar sem nú er að ljúka en verkefnið hefur staðið yfir í þrjú ár. Sex nemendur ásamt Sigurlaugu kennara á sjúkraliðabraut og Hrafnhildi Hafberg alþjóðafulltrúa fóru til Leeuwarden í Hollandi þar sem áfram var haldið að vinna með hugmyndina um notkun á tónlist í umönnunarstörfum. Verkefnið er styrkt af Erasmus+ og þátttökulöndin voru Holland og Litháen auk Íslands en Listaháskóli Íslands og Físmús – Félag músíkmeðferðarfræðing á Íslandi tóku þátt í verkefninu ásamt FB. Samstarfið var gott og árangursríkt og nemendur FB voru einstaklega áhugasamir og skólanum til sóma.

Ekki missa af jólamarkaði starfsbrautar!

Það var hátíðleg stund í FB í dag þegar fyrsta skóflustungan var tekin að nýrri 2.654 fermetra verknámsaðstöðu fyrir húsasmíði, rafvirkjun og listgreinar en með tilkomu nýs húsnæðis mun starfsnámsaðstaða FB rúmlega tvöfaldast. Eftir undirritun verksamnings tóku þau Óskar Jósefsson forstjóri FSRE, Lovísa Eðvarðsdóttir formaður nemendafélags FB, Guðrún Hrefna Guðmundsdóttir skólameistari, Einar Þorsteinsson borgarstjóri og Ásmundur Einar Daðason mennta- og menningarmálaráðherra fyrstu skóflustunguna að viðstöddu fjölmenni. Sjá nánar á vef Stjórnarráðsins: https://www.stjornarradid.is/efst-a-baugi/frettir/stok-frett/2024/11/26/Meira-og-betra-verknam-med-staekkun-FB/ 📸 Hallur Karlsson

Nánari upplýsingar: https://www.fb.is/jolakortasamkeppni-2024

Vinir okkar í samfélagslögreglunni heimsækja FB reglulega. Í vikunni hitti Unnar alla nýnema og einnig nemendur á starfsbraut og ræddi meðal annars um ofbeldi, störf lögreglu, lögreglunámið og fleira. Takk fyrir komuna!

Í dag fóru tveir kennarar á rafvirkjabraut með alla þrjá nýnemahópana hjá deildinni í skemmtilega vettvangsferð í Írafossvirkjun í Soginu. Þau fengu stutta kynningu á sögu Sogsvirkjana og skoðuðu svo virkjunina sjálfa hátt og lágt en þetta er fyrsta virkjunin á Íslandi sem er byggð neðanjarðar. Frábær ferð með flottum og fróðleiksfúsum nemendum!

Sjö nemendur í lokaáfanga á fata- og textílbraut í FB héldu tískusýningu ásamt Tækniskólanum í Hinu húsinu 2. nóvember sl. og er sýningin hluti af listahátíðinni Unglist 2024. Þema sýningarinnar var ‘átök’ – innri sem ytri – þar sem hver flík sagði einstaka sögu í gegnum liti, form og efni. Sýningin var hin glæsilegasta þar sem framtíð íslenskrar tísku og listsköpunar lét ljós sitt skína. Nemendur FB sem tóku þátt í sýningunni eru þau Agnes Líf Hildardóttir, Helen Giang Le Ngo, Hilmir Steinn Óskarsson, Ismael Þorgils Jónsson, Nehimiya Tadese Lemma, Norienne C. Morales Garcia og Victor Friðjónsson. 📸 Hafsteinn Snær Þorsteinsson

‘Átök’ – tískusýning í Hinu húsinu! Sjö nemendur í lokaáfanga á fata- og textílbraut í FB halda tískusýningu ásamt nemendum Tækniskólans í Hinu húsinu, Rafstöðvarvegi 7, á morgun laugardag kl. 19:30. Sýningin er hluti af listahátíðinni Unglist 2024. Nánar um sýninguna: Komdu og upplifðu ferska og djarfa hönnun nemenda í fatahönnun. Þema sýningarinnar er “átök” – innri sem ytri – þar sem hver flík segir einstaka sögu í gegnum liti, form og efni. Ógleymanlegur viðburður þar sem framtíð íslenskrar tísku og listsköpunar rís á sviðið.

Starfsbraut FB fór í haustferð að Hvaleyrarvatni fyrir helgi þar sem áhersla var lögð á ljósmyndun, útivist og listsköpun. Vel heppnuð ferð í fallegu veðri!

Nemendur í hönnun, nýsköpun og frumkvöðlafræði hjá Soffíu Margréti Magnúsdóttur fengu í dag afhendan styrk úr Loftslagssjóði ungs fólks í Reykjavík við hátíðlega athöfn í Höfða. Markmið verkefnisins er að vekja ungt fólk til vitundar um textílsóun á útihátíðum og benda á hringrásarhugsun með því að sýna fram á nýsköpun úr notuðum tjöldum. Verkefnið fær einnig styrk frá Sorpu sem útvegar notuð tjöld og afrakstur þess verður til sýnis á samsýningu framhaldsskólanna í Ráðhúsinu í lok nóvember. Þau Helen Giang, Hilmir Steinn og Nehimiya veittu styrknum viðtöku fyrir hönd hópsins. Til hamingju öll!

Her eru fleiri myndir frá frábærri ferð til Litháen þar sem haldin var alþjóðleg ráðstefna í tengslum við DaDom Erasmusverkefnið sem sjúkraliðabraut FB tekur þátt í. Nemendur okkar og Sigurlaug kennari á sjúkraliðabraut héldu flott erindi um hvernig við nýtum þekkingu okkar um notkun tónlistar við umönnun heilabilaðra í kennslu á sjúkraliðabraut. Þátttökulöndin auk Íslands eru Holland og Litháen.🇮🇸🇳🇱🇱🇹 #erasmusplus

Nemendur og kennarar á sjúkraliðabraut FB taka þátt í alþjóðlegu Erasmusverkefni sem nefnist ‘DaDom’ eða Daily Dose of Music í samvinnu við nemendur og kennara frá Hollandi og Litháen. Verkefnið snýr að því að nota tónlist á hverjum degi í umönnun heilabilaða. Frábært verkefni því sannað er að tónlist hefur jákvæð áhrif á heilabilaðra. Á þessum myndum má sjá nemendur í heimsókn á hjúkrunarheimili og dægradvöl fyrir eldra fólk í Litháen. 🇮🇸🇳🇱🇱🇹#erasmusplus

Áslaug jarðfræðikennari og Guðlaug íslenskukennari fóru með nemendur sína í valáfanganum ELDG3JÍ05 í vettvangsferð að Kleifarvatni, Seltúni og Grænavatni, á slóðir bókarinnar Eldarnir eftir Sigríði Hagalín. Í áfanganum kynnast nemendur því hvernig eldsumbrot og jarðhræringar birtast í þjóðsögum, goðsögum og nútímabókmenntum. Nemendur læra meðal annars að greina á milli skáldskapar og staðreynda. 🇮🇸🌋

Fánadagur heimsmarkmiða Sameinuðu þjóðanna um sjálfbæra þróun er í dag 25. september. Tilgangur fánadagsins er að minna á mikilvægi heimsmarkmiðanna. FB hefur verið UNESCO skóli frá árinu 2019 og flaggar með stolti heimsmarkmiðafánanum í dag og sýnir þar með skuldbindingu sína við heimsmarkmiðin og aðgerðirnar sem þau krefjast. #TogetherForTheSdgs

Á fræðsludeginum fóru rafvirkjanemar í Elliðaárdal, kíktu á laxana á brúnni og fengu svo leiðsögn um gamla rafveituhúsið og svæðið í kring. 🤗

Listnámsbrautin heimsótti nokkra áhugaverða staði í borginni á fræðsludeginum. Nemendur kynntust Sigga sjéní og fengu innlit í framtíðina í Þjóðminjasafninu, fóru í Hámu á Háskólatorgi í hádegismat og svo fengu nemendur kynningu á Eddu - húsi íslenskunnar og arkitektúrnum þar. 🇮🇸

Nemendur starfsbrautar fóru í skemmtilega ferð um Suðurnesin á fræðsludeginum. Farið var í heimsókn á Þekkingarmiðstöð Suðurnesja og svo á Kaffi Golu, Hvalsnesi auk þess að skoða kirkjuna á Hvalsnesi.😍🇮🇸

Fallegar myndir úr jarðfræðiferð til Þingavalla á fræðsludegi!🇮🇸

Nemendur af íþróttabraut skemmtu sér vel í Keiluhöllinni í dag!🎳🎳🎳😍#fræðsludagurinn

25 nemendur FB fengu frábærar móttökur þegar þeir heimsóttu Borgarleikhúsið í morgun. Þau voru sér og skólanum til mikils sóma.💜Í dag er sem sagt fræðsludagur og þá er kennsludagurinn brotinn upp og nám fer fram utan hefðbundinnar stundatöflu. Kennarar skipuleggja kennslufyrirkomulag fræðsludaga sem getur verið mismunandi eftir fagdeildum og kennslugreinum. Nemendur mega velja einn viðburð fyrir og einn eftir hádegi.😍🥳